Halloween Astea

Santu Guztien eguna zela eta, aurreko astean zehar Txurdinagabarri Egoitzan Halloween Astea ospatu genuen.

Aste osoan zehar ospakizun horri lotutako jarduera bereziak egin genituen, bere ezaugarria izanik terrorezko literatura eta zinema generoetako motiboetan isla zehatza dauka: burezurrak, kanposantuak, banpiroak…

Eskulan tailerrak Halloweeneko apaingarriak egitera bideratu ziren, kalabazak, saguzarrak edo armiarmak, esaterako, eta sukaldaritza tailerrak ere festa hori izan zuen helburu.

Irakurketa errazeko tailerrean, beldurrezko istorioen bertsio egokituak irakurtzen aritu ginen: Frankenstein, Gizotsoa, Bururik gabeko Zaldizkoa, Ness lakuko munstroa, Jack eta kalabaza.

Halloweeneko zine berezia izan genuen, “Adams familia” filmaren proiekzioarekin, eta gure ohiko bingoan zenbakien edo ohiko animalien ordez Halloween ikonografiako elementuak jarri genituen.

Gehien gustatu zitzaigun jardueretako bat “escape room” izan zen; bertan, egoiliar talde batek giltza bat lortu behar zuen aretotik irteteko, asmakizunak asmatuz eta hainbat arrastori jarraituz, guztiak ere misterioaren eta izuaren munduarekin lotuta.

Astea ezin hobeto amaitzeko, odolez, armiarma sarez, banpiroz eta sorginez betetako mozorro festa antolatu genuen, eta, batez ere, umore onez eta ondo pasatzeko gogoz.

 

 

 

Tagged with: ,
Posted in Aita Menni